國務院最近確定咗七大戰略性新興產業，分別係節能環保、新一代訊息技術、生物、高端裝備製造、新能源、新材料和新能源汽車。據講未來有關部門將設立專項資金，建立穩定嘅財政投入增長機制，並會制訂稅收支持政策，鼓勵金融機構加大信貸支持，發揮多層次資本市場嘅融資功能，發展創業投資和股權投資基金。從近兩年家電及汽車產業發展，足見產業政策傾斜嘅威力，未來上述七大戰略性新興產業發展步伐將會明顯加快，長線投資者宜盡快針對這些行業作出部署。
券商股可長線持有
回說昨日市況，唔知大家有冇留意，呢期券商股有買盤追捧，國泰君安（01788）股價已重上水面（招股價4.3元），昨日收報4.39元，升6.3%；而大福證券（00665）亦升4%，收報5.68元。中證監已正式開放證券公司喺取得QDII資格和外匯額度後，可向境內客戶提供定向資產管理服務，而過去數天本港財金官員北上，爭取盡快推出小QFII，這些發展都十分有利本港嘅金融業，具有中資背景嘅券商及基金就更加處於有利位置。上述提及嘅兩隻中資券商股，可以安心持有，繼續放長線釣大魚。
阿莊手持嘅錦江酒店（02006），昨升5.5%，收報2.11元，相信震倉活動已完成，突破250日線2.2元可加注。另昨日提及嘅瑞聲聲學（02018），股價僅調整一天，昨如期再展升勢，收報14.98元，升6.7%，有上車嘅話，可穩坐釣魚船。要選大價股，阿莊認為聯通（00762）走勢亦唔錯，周二股價見高位11.8元後觸發獲利回吐，但10日線11元現支持，昨日再度回勇，收報11.48元，升3.4%。
iPhone4成吸客殺着
傳聞本月中聯通將推出iPhone4，市場憧憬此舉可助其加快吸收新嘅高端用戶。事實上，早前聯通嘅iPhone業務發展稍遜預期，主要係推出初期全為不帶WiFi嘅「閹割版」iPhone，致使「果粉」寧願高價追入水貨。不過，打從八月上旬，聯通正式引進WiFi版iPhone3GS，情況已有改善。若本月中旬如期推出iPhone4，對其3G業務嘅刺激作用值得期待，而參考最近香港數碼通（00315）宣布嘅年度業績表現亮麗，亦有助加強投資者對聯通iPhone業務嘅信心。
再睇自聯通宣布中期業績後，大行評價正面。阿莊相信，打從其股價確認突破10元關阻力位，新升浪已展開，料年底前可反覆上試13元關，10元水平已成為主要承接區。
戰報
堡獅龍（00592）
零售股呢期當旺，積奇尋日推介的堡獅龍大幅飆升，更創0.8元一年新高，以低位0.66元計，單日升幅21%。
大福證券（00665）
錢進周一指大福證券將有炒作，昨日股價果然再升，並高見5.74元，較推介當日低位4.97元，累升15%。