兩個負面消息包括中移（00941）策略股東Vodafone減持手上6.43億股或者3.2%的股份；另外中銀監要求商業銀行，唔好將「盤數」做得太靚，盛傳要它們將減值準備佔貸款總額比例提高到2.5%。4隻受消息影響嘅股份，包括中移、中行（03988）、工行（01398）同建行（00939），合共拖低大市111點，佔恒指跌幅大約35%，以4隻股票佔恒指比重26%，純粹話佢哋拖低大市，並不恰當，45隻藍籌得4隻唔使跌，跌得都幾全面，似乎話基金經理搵藉口減磅更加貼切。
策略股東沽貨，筆者即時聯想到三個原因。一，自從中國發三個3G牌，中移早就兩面受敵，增長股變咗基建股；二，Vodafone最初想藉中移策略股東身份進軍中國，可惜如意算盤一直打唔響；三，中移坐擁巨資又不更慷慨回饋股東，這投資回報對Vodafone來說形同雞肋。
中移低回報遭嫌棄
試想想，Vodafone這類被動投資者，收3.6厘股息，對比本身近12%股東資本回報率（等於每100蚊股東資本賺取12蚊的經營利潤），不如攞錢套現搵其他業務發展機會好過。姑勿論點，事件可看到Vodafone心灰意冷，但亦掃除市場一直擔心策略股東沽貨的疑慮。
至於銀監要內地銀行最少做2.5%壞帳準備的消息，就更弔詭。上半年四大國有銀行中，只有農行（01288）準備金佔總貸款比例超過指引，去到3.15%，其餘的建行為2.49%、工行2.39%、中行2.26%，都與2.5%指引及市場預期差唔多，如果要強行「預鬆啲」計提撥備，大部分在2%以下的中小型內地銀行，所受影響反而較大，但話說回頭，會計政策向來以審慎為原則，撥多撥少只係帳面影響，反而銀監係咪睇到啲嘢係市場睇唔到，更為重要，但暫時睇消息有被市場誇大之嫌。
講番逆市奇葩，中銀香港（02388）是大跌市下兩隻仲錄得升幅的藍籌之一，香港作為人債發行境外試點，市場自然聯想到直接受惠的人民幣結算銀行。中行來港發行50億元人民幣債券，中銀作為聯席牽頭行及簿記行，其股價自五月底16.16元起步，升到尋日高見22.75元，累積升四成一，相比同期大市升幅只得一成一。
中期業績令人失望
今次發債的商業利益，對每年賺百五億港元的中銀來說，幫助查實極有限。或者有人認為，未來香港人債市場可大可小，但近日升勢也未免過分，尤其是早前公布的中期業績相當令人失望，半年多賺7.5%至71.9億元，是市場預期中下限，在拆息持續低企下，淨存款銀行中銀的淨息差壓力唔細，按年跌0.21厘去到1.58厘。
睇番宏觀環境，美國加息無期，息差壓力仲會維持一至兩年，經過○八年及○九年後，資產質素再大幅改善空間有限，中銀最大賣點，仲係身為中行的現金牛，繼續慷慨派送，以超過4厘的股息回報，揸貨的大可安心繼續收息，可是近期炒人債概念炒到火紅火綠，未有貨者，看來仲未係入貨時候，考慮埋增長條件，19至20元水平，會係比較合理嘅入貨位。