瑞聲聲學（02018）遭兩名主要股東配售合共4,500萬股舊股，每股作價14.4元，涉及套現資金約6.48億元，昨日其股價跌5.26%，收報14.04元，相信嚟緊業績仍然強勁，股價表現值得期待，14元樓下可以跟進。
重磅股滙控（00005）主席葛霖於年底前退任，出任英內閣官員。市場預期，為配合滙控喺亞洲區嘅業務發展，新主席人選將着重與中國嘅關係，但無論如何，相信高層人士變動未對營運構成重大影響，昨日股價跌1.3%，與市況同步，向上主要阻力位仍然喺250日線82.6元，近月支持喺75元。
內銀股毋須過慮
昨日內銀股全線向下，主要係消息指銀監會擬提高銀行撥備佔貸款比率。不過，阿莊認為，呢兩年中央投放大量資金刺激經濟，銀行配合政策不斷「放水」，待經濟企穩，着手控制好銀行業風險，係好事而唔係壞事，故投資者暫毋須自亂陣腳。
呢期興炒二、三線股，零售股炒作停不了，景福集團（00280）一係唔發市，發市當三年，昨日再升一成。
今日建議留意一隻異動股東岳集團（00189），昨日股價升9%，收報2.41元，成交6,604萬元。東岳主要從事製冷劑、高分子材料及有機硅等業務，產品供應予大金、杜邦、三菱、海爾、格力、美的、長虹等企業，近年業務朝新環保、新材料及新能源等領域發展。
擴產效益可憧憬
上月底，公司宣布截至今年六月底止半年純利2.74億元（人民幣．下同），同比增長達3.3倍，去年度全年純利才1.65億元。中期業績理想，主要受惠製冷劑業務收益及溢利率均顯著上升。
期內，首套裝配國產離子膜嘅萬噸級氯堿裝置喺旗下山東廠房成功運行，而規模達到六萬噸嘅甲烷氯化物擴建項目，亦按計劃喺五月建成並投產，為製冷劑業務嘅原料提供可靠嘅支持。
此外，達7,300噸嘅高性能PTFE擴建項目已於七月份開始逐步投產，而10萬噸有機硅單體擴建項目安裝設備階段已近尾聲，料年底投產。
可見，公司業務將踏入收成期，擴產效益可予憧憬，保守假設下半年業績與上半年相若，現價預測市盈率唔夠九倍，昨日股價創五十二周新高，但估值仍吸引，毋須「畏高」！
戰報
中國稀土（00769）
Sammi尋日推介嘅中國稀土，走勢強勁，更逆市創2.5元一年新高，以低位2.12元計，單日升幅17.9%。
保利協鑫（03800）
錢進上周五推介的保利協鑫（03800），昨日一度高見2.17元，較推介當日低位1.88元，累升15.4%。