本文重點
內地企業股份化仍然係大趨勢，改組過程中牽涉好多專才，會計師就係其中一瓣。「四大」之一嘅畢馬威已經鎖定目標，要喺大陸請千五個畢業生，數吓手指，呢批畢業生可能屬於「九十後」，唔知係咪擔心新一代面對挫折嘅承受能力，佢哋打算提供「員工關懷計劃」，真係照顧周到。
內地招聘千五人
太子早輪喺上海同畢馬威華東華西區首席合夥人馮光明食飯，佢當時已經話要請好多人，主要係應付強勁嘅業務需求。尋日有內地傳媒引述佢話，二○一一年度全國應屆生招聘會率先在上海啟動，計劃在上海、北京、廣州、深圳等全國範圍內招收應屆大學畢業生約1,300至1,500名。
明年畢業嘅大學畢業生，好多係出生於一九九○年左右嘅「新一代」，太子擔心新一代嘅小朋友係咪有能力應付挫折。畢馬威就好有先見，話會首先為佢哋提供「員工關懷計劃」，即係由經驗豐富嘅經理擔任新人嘅「導師」，幫助佢哋融入新工作。