08/09/2010

播放本新聞相關短片
查詢股票編號

股海實戰: 中信資源 小注短炒無妨

港股窄幅上落,恒指高低波幅僅122點,收報21,401點,升46點,大市成交582億元。內地股市亦未見太大回吐壓力,滬綜指一度高見2,704點,收報2,698點,升2點。

呢期游資輪流煲起不同板塊,昨見個別汽車股現疲態,東風集團(00489)跌4.2%,廣汽(02238)跌0.57%,新加入接力嘅就有家電股,TCL多媒體(01070)及創維數碼(00751)午後發力,分別升19%及10%。

商務部公布,今年首八個月全國家電下鄉產品累計銷售4,635萬台,實現銷售額1,009億元人民幣,同比增幅分別達到1.6倍及2.1倍。其實當初中央為咗推動內需,保持經濟穩快增長,對家電及汽車產業推補貼政策,阿莊都冇諗過成效可以咁大,但睇到近年呢兩個行業嘅數據,可想而知養活多少勞工和企業,亦證明中央施政方向正確。

零售股高處未算高

另一方面,上周開始熱炒嘅零售股就高處未算高,就連一批靜咗好耐嘅零售股,如先施(00244),鱷魚恤(00122)及漢登(00448)亦見異動,其中先施股價一度急升88%。相對而言,近期堡獅龍(00592)及廸生創建(00113)表現都算落後,值得留意。

第一視頻(00082)昨日復牌,並宣布收購一家手機方案設計商,股價一度抽上2.5元,收報2.41元,跌0.4%。講到呢類股,查實三網融合發展確可帶來龐大嘅新商機,若然今年相關企業交得出成績表,整個板塊嘅估值有上調空間。

鋼鐵股繼續有資金流入,鞍鋼(00347)再升3.8%。講開又講,從事石油、錳、煤及電解鋁業務嘅中信資源(01205),股價自七月底開始呈上落格局,昨日始隨升市突圍,收報1.82元,升4%,成交增至4,213萬元,乃自四月底以來首次重上1.8元樓上收市,論走勢確有留意價值。

分拆錳業進度良好

截至今年六月底止中期,中信資源業績轉虧為盈,賺1.67億元,旗下遼寧渤海灣盆地之海南─月東區塊內嘅月東油田,整體開發方案已於上月獲得政府批文,即將進行試產,年底前有望開始石油生產。其他業務方面,以錳業務表現較為理想,公司已於七月份就分拆錳業務重提上市申請,順利嘅話,年內有機會成事,屆時將可釋放其資產價值。

平心而論,由於盈利復甦進度尚需更多數據以作評估,而分拆錳業務一事尚未落實,風險因素不容忽視,現價係咪抵買,見仁見智,而喺同類股中,論盈利表現,亦不乏更好嘅選擇。

不過,呢隻股勝在價位唔大,短線因應近期游資去向短炒一轉,亦未嘗不可,向上主要阻力喺2元關,穿1.71元止蝕。

戰報

華潤水泥(01313)

阿莊上月三十一日指華潤水泥有條件挑戰高位,昨日果然創4.32元新高,較推介當日低位3.75元,累升15%。

中國地產(01838)

錢進上月三十一日推介中國地產,當日低位1.96元,近日持續做好,昨日高見2.23元,累積升幅13.7%。

阿莊