科技愈嚟愈普及，相信唔少人都試過用衞星導航（GPS）搵路。原來證券界都有人用衞星圖片做業務分析。太子就覺得噱頭大過一切。
講緊嘅係瑞銀喺美國分別向兩家私人衞星公司購買衞星圖片，用嚟數住美國最大超市之一Wal-Mart個停車場每個月有幾多車流量。愈多車即係表示生意額就愈好，預測報告亦依據泊車數目而來。
預測能力有幾高？以第二季為例，傳統分析估銷售額按年跌1%，衞星圖片分析就話唔同地區嘅Wal-Mart六月時車多咗好多，所以銷售額會升0.7%，最終呢家超市集團第二季銷售額年增4%。瑞銀話，有實質數據支持，好過淨係聽分析員嘅意見。
