自從聯儲局主席伯南克在全球央行年會重申，量化寬鬆政策唔會改變，即使美國振興經濟的第一輪子彈用盡，仲有其他飛機大炮，可應對當前經濟復甦力度疲弱的困局，言論曝光後，華爾街對美國短息及長債息見底回升的憂慮明顯紓緩，股市氣氛好番，VIX指數回到接近歐債危機前水平，咁嘅大環境下，勉強睇淡港股實屬不智。
況且，中國股市預測市盈率僅十四、十五倍，接近歷史區間下限，即使短期未見底，相信亦離底不遠，港股年底能否見到大摩兩萬六點的樂觀預測？
筆者主觀意見係五五波，但兩萬四、兩萬五點在估值上一啲唔過分，四個月時間有最少12%回報，喺今日低息年代，潛在回報已經算係吸引。
收購觸礁中策捱沽
中策（00235）收購南山人壽觸礁，主理人話未決定下一步行動，但股份率先復牌，狂插四成，跌0.21元，收報0.31元，重返去年十月起步原點，亦即係話，憧憬中策進軍台灣保險業，或者純粹捧柯大俠、馬教授場的股民，全部都要損手。
收購無下文，中策變番隻空殼，尋日插水後市值仲有11.5億元，比本身資產淨值7.6億元高五成一。一班大孖沙當日認購買0.1元可換股債券，收購南山不成，毋須認頭全身而退，可憐嘅只係一班以為有大茶飯食，1元仲走去接火棒的小股民！故事告訴大家聽，一日未發生嘅事，唔好當成事實。
中央要達到「十一．五」的節能目標，又有新政策，內地消息指，高用電量鋼鐵產業的個別生產商已被勒令停產，最多長達一個月，證券行估計，受影響的鋼鐵生產企業會愈來愈多，美銀美林估計最終會令全國全年產量減低3%。
消息下，鋼鐵股反應都算正面，事關節能減產消息，市場估計會直接刺激鋼材價格，在未來幾個月上升，生產商毛利會進一步有改善。營運槓桿最高的馬鋼（00323），尋日升一成或者0.42元，收報4.57元，但論到吸引力，筆者認為鞍鋼（00347）更勝一籌。
限電成鋼價救命草
年初鋼材價格由谷底回升，加上鞍鋼調整產品結構，增加高毛利鋼材比重，鞍鋼上月發盈利預喜，指首三季度累計淨利潤介乎23億至29億元（人民幣．下同），同比升5.97至7.79倍。
不過，回顧鞍鋼上半年已賺27.5億元，反映第三季僅得微利甚至輕微虧損，一來是鐵礦石價格上升影響，其次是內地打壓樓市炒風下，第三季經濟轉吹淡風，鋼價有回落情況，故今次突如其來的限電，刺激鋼價，可以說是及時雨。
鞍鋼股價年初至今累積跌幅為26%，股價的下跌已經預早反映第三、四季的問題，藉住今次的新消息，即使未必可以重返年初的18元水平，但從估值上的考慮，反彈見14至15元機會並唔細。