昨日美股休市，港股是否預先反映美國政府推出新刺激經濟措施嘅消息，不得而知。阿莊亦唔敢講港股能唔能夠突破上落格局，且先觀察本周能否企穩喺21,000點水平，再作定論。
論異動股，當然不少得昨日午後復牌嘅中策集團（00235），事緣公司嘅復牌通告話，未就收購南山人壽決定下一步行動，投資者對於公司呢項大舉措打定輸數，故見其股份一復牌即大插水，低位見過0.28元，收報0.31元，逆市急挫40%，成交2.39億元。一沉百踩，金魚缸向來都係咁現實！
除港股外，內地股市氣氛亦有回暖迹象，滬綜指一度逼近2,700點，全日高位2,698點，收報2,696點，升1.54%，滬、深兩市主板成交合共超過3,000億元人民幣，上升動力正在加強。若然今轉滬綜指能夠順利突破2,700點，勢必展開新一輪攻勢，屆時可以加注追入重磅國企股。
鋼鐵股昨日先拔頭籌，馬鋼（00323）、鞍鋼（00347）及重鋼（01053）升幅介乎6.6至10%。內銀股中，農行（01288）發力創掛牌以來新高，全日高位3.68元，收報3.67元，升2.8%，成交達到10.6億元。阿莊手持嘅中國南車（01766）加注合時，昨日見五十二周即市新高6.94元，收報6.92元，升3.2%。
從事開採焦煤炭，以及產銷焦煤產品及有關副產品嘅福山能源（00639），今年上半年錄得營業額26.58億元，同比增長27%；純利8.37億元，同比增長9%。期內毛利率達到70%，每股盈利15.56仙，中期息每股5仙，表現不俗。
客戶名單粒粒皆星
公司嘅策略，乃與大型鋼鐵廠合作，以穩定煤炭銷量。今年上半年，內地最大嘅鋼鐵企業——河北鋼鐵集團便成為公司最大客戶，佔營業額34%，另首鋼集團、內蒙古包鋼集團和山西大土河焦化亦繼續為其長期客戶和策略性合作夥伴。
雖然市場預期下半年焦煤價格或有輕微下跌壓力，但嚟緊係鋼鐵業旺季，有現小陽春之象，加上福山有大客關照，相信全年計業務可保持穩定。該股昨日收市報4.5元，升3.2%，成功重上50日線（4.38元），現價明年預測市盈率約十二倍，過去四個月股價在4至5元水平上落，若能企穩喺50日線樓上，有望試衝上落區阻力位，十日線支持在4.29元。
戰報
亨泰（00197）
冼金基上周五推介亨泰時，當日低位0.93元，昨日股價顯著攀升，最高升過上1.13元，升幅達21.5%。
+21.5%
雷士照明（02222）
本月一日阿莊建議逢低買入雷士照明，當日低位3.44元，昨日創3.77元上市新高，累積升幅9.5%。
+9.5%