上周五恒指一度重上21,000點，尾市有獲利回吐，收報20,971點，升102點，大市成交增至726億元，其中90億元來自平保（02318）遭新橋亞洲減持嘅1.39億股上板。
圍繞內地市場，本月有兩大焦點，其一係盛傳醞釀多時嘅保險資金投資不動產細則即將公布，其二係新興能源發展規劃有機會在本月底出台。未知是否睇準有政策消息配合，投行消息指，內地第二大風力發電機組製造商──A股金風科技（002202），擬再度啟動在港發行H股嘅上市計劃，集資額超過60億元，若然今次重啟順利，可順勢留意翻兜風電股嘅機會。
九龍塘義德道三號、五號官地被勾出，十月拍賣，睇嚟好大機會與上周拍賣嘅一號地皮合併發展，又多一個市區豪宅項目。政府一直在講會着手增加土地供應，但大部分都係用嚟起豪宅，未能有效針對解決用家上車難嘅問題。有建議指可將物業區分為居住及投資兩個市場，即就二者劃分一個區別，例如樓價逾2,000萬元屬投資物業，並提高內地移民投資物業市場嘅門檻。
將呢個理論套用喺「食」身上，富者可以繼續餐餐食冬蟲草或鮑魚，呢啲食品價格搶到幾高都唔影響民生，但普羅大眾常用嘅食品則必須維持穩定嘅價格和供應。究竟最終方案如何，相信十月施政報告將會揭盅，此前沾手地產股，須注意政策風險。
車股提防政策風險
上周汽車股表現回勇，但官方傳媒引述國家發改委官員指出，內地汽車企業快速擴張，加劇產能過剩嘅風險，故必須採取措施以防過熱，呢番話猶如對熾熱嘅汽車市場澆下一盆冷水，惜如今投資人頭腦發熱，未必奏效。
轉移視線至其他板塊，航空股龍頭中國國航（00753）股價在八月初見高位9.76元後反覆回落，八月三十一日低見8.25元才止跌，上周五重上9元樓上收市，報9.09元，單日升幅2.02%。
事實上，今年以來，航油價格表現有序，有利航空企業控制成本。此外，隨着區內經濟持續復甦，航空運輸需求回升，公司今年上半年實現純利46.12億元人民幣，同比增長六成，可以話係區內航空業復甦嘅取大得益者。
阿莊相信，下半年區內航空運輸需求將繼續暢旺，加上國際市場亦逐步改善，國航全年業績可報佳音，計落現價預測市盈率介乎十至十一倍，估值吸引，股價突破10元大關指日可待，止蝕位8.4元。
戰報
中信1616（01883）
積奇上周五推介的中信1616有異動，最高升過上2.53元，以當日低位2.12元計，單日升幅19.3%。
JOYCE（00647）
錢進上周四推介的JOYCE，表現亦唔失禮，上周五一度升上0.325元，較推介當日低位0.295元，升10.1%。