本文重點
臨近中秋節，唔少餅家推出月餅，大賣廣告，好似稻香（00573）雖然唔係首次賣月餅，不過今年佢哋就大灑金錢，用咗800萬元做宣傳，亦首次喺電視賣廣告，公司嘅行政總裁梁耀進話，今次賣廣告係為打響品牌，賺唔賺到錢係其次，最終目標係北望神州嘅龐大市場。
大做宣傳冀響品牌
近年愈來愈多食肆推出月餅，太子問梁耀進做月餅係咪好賺錢，佢笑笑口話各大食肆嘅利潤大致相若，不過今次佢哋大賣電視廣告，希望多啲內地人認識。
講開稻香，佢哋上半年盈利增0.7%，上半年本港收入跌0.1%，反而內地收入增11.1%，同店銷售增1.5%，梁氏話，上半年食材價格升8%，下半年升幅估計差不多，希望明年第一季投產嘅食品物流中心，可以抵銷部分成本上升啦。