本文重點
體操王子李寧好耐冇代表李寧（02331）出來見人，尋日特登由北京飛來香港同投資者同傳媒見面，親自為快意節能（08032）單刁解畫，不過講講吓嘢，「王子」突然講咗聲「唔好意思」，然後企起身郁下條腰，原來佢話自己上年做咗腰嘅手術，條腰唔多舒服，所以需企喺度講嘢。
克服腰患為入股解畫
體操王子大玩財技，公布將自己持有嘅李寧「唧」入快意節能，連串動作令市場人士費解，令到李寧嘅股價呢幾日係咁跌。已淡出管理層嘅李寧尋日親自現身，同大家當面溝通，解釋公司點解要咁做。
李寧一啲架子都冇，一坐低就話自己廣東話唔好，不如用普通話講，然後又自嘲自己普通話都唔算好。不過太子覺得身為廣西人嘅李寧啲廣東話同普通話都一樣好。
太子對上一次見體操王子係○八年北京奧運時佢做火炬手，當時年紀已經唔輕嘅佢仲做到一啲高難度動作，但係原來佢有腰患，上年做咗手術。話時話，原來李寧係九月八日出生，以今時今日快意節能股價嘅升勢，佢今次份生日禮物都應該唔小嘢。