恒指繼續窄幅上落，投資者悶到發慌，一見到有炒作機會梗係唔會放過，香港零售數據理想，零售股便成為「餓狼」獵物，景福（00280）、漢登（00448）、安莉芳（01388）及慕詩國際（00130）均錄得雙位數字升幅，且成交動輒數千萬元，十分活躍。不過，過去零售股炒風唔長，今次升浪又可持續多久，要視乎短期內炒家會否找到新嘅炒作對象。
其他異動股方面，昨日復牌嘅快意節能（08032）宣布，購入李寧（02331）30.9%股份，另悉數收購非凡中國體育權益，以及投資瀋陽嘅工業園項目，以發展生態城。
快意節能暫宜觀望
顯然，呢隻股經已脫胎換骨，憑着體育及綠色相關業務雙線發展，前景會較李寧更多姿多采，昨見其股價復牌後一度高見0.98元，收報0.92元，升17.9%，相信喺下一輪大動作前，股價會先行整固，暫宜以靜制動。
早前阿莊內文提及過嘅龍昌國際（00348）亦見異動，昨日收報0.4元，升14.2%，唔排除涉足內地航空業嘅交易有新進展，可以多望兩眼。此外，中國澱粉（03838）股價喺0.8元水平現承接，昨日收報0.83元，有勢挑戰0.9元關，唔好走漏眼，跌穿0.79元止蝕。
回說投資組合，阿莊手持嘅中國南車（01766）似要開快車，昨日創收市新高6.66元，可以安心坐順風車。表現同樣令阿莊滿意嘅有上海實業（00363），昨日以全日高位39.15元收市。揸呢兩隻股好在穩穩陣陣，唔使擔心股海風起雲湧。另一方面，平保（02318）停牌經已兩個月有多，聽聞短期內會復牌，且看復牌過後表現如何，或會沽出套現加注中國南車。
美國經濟尚未見出路，資金紛紛湧往金市避險，金價升至兩個月高位，帶動金礦股上揚，招金礦業（01818）創五十二周新高21.6元，收報21.15元，升3.9%。食住呢條水，追落後可選瑞金礦業（00246）。該股喺六月底七月初曾以先舊後新方式進行配股集資，每股作價12.15元，集資11.8億元作為日後收購之用。
瑞金昨日收報12.16元，股價與五十二周高位15.74元尚有一段距離。明顯可見，集團股價自去年二月以來反覆向上，底部不斷上移，若短期受惠金礦股氣氛，能以大成交一舉突破13元關，後市可試五十二周高位，跌穿11元止蝕。
戰報
第一拖拉機（00038）
冼金基周二指一拖買得過，當日低位5.2元，昨日一度升上5.74元高位，累積升幅10.3%。
第一視頻（00082）
帥哥周二推介第一視頻，當日股價曾低見2.01元，但之後迅即反彈，昨日高見2.31元，升幅14.9%。