交接儀式淚強忍

太子尋日睇到一篇關於李榮融嘅報道，估唔到從事石油石化行業出身嘅佢，原來都好感性，佢話「喺交接儀式上面，我同自己講，千祈咪流眼淚」，睇得出佢真係好唔捨得國資委，仲話自己好鍾意着白恤衫，「因為咁樣更精神，更有年輕人嘅活力」，最後佢仲要退而不休。

呢排佢會留喺北京充電，邊度都唔去，過一排之後，佢想去清華經濟管理學院讀管理學，仲要學好用英文演講，事關以前每次去外國考察佢都需要翻譯。

李榮融喺國資委嘅七年零五個月，主力管央企，任內將央企由196家縮減至123家，資產規模就由7萬億增加到21萬億，累計上繳稅金達5.4萬億元，唔通咁都未夠？仲要去學管理學？原來佢嘅座右銘係「傾心於事業，敬業於崗位」。佢仲話自己都仲好願意做民企老闆，不過市傳佢將會去全國政協經濟委員會度擔任新職務喎。