本文重點
中國基建港口（08233）主席周光暉，近期風塵僕僕，因為佢係多家公司嘅獨立非執董，依家適逢公司業績高峰期，佢梗要忙開董事會。一啲公司可能會喺外地開董事會，好似佢任獨立非執行董事嘅招行（03968），上月份就去咗內蒙呼和浩特開董事會，所以佢亦要去咗內蒙一趟。
與牛根生惺惺相惜
幸好此行所獲甚豐，除咗有機會一睹內蒙最出名嘅草原風光外，佢亦有機會同蒙牛（02319）創辦人牛根生見面同食飯，周光暉大讚牛根生為人爽朗，飯局氣氛好好，睇嚟兩人惺惺相惜！
去到內蒙，周光暉仲試飲蒙牛嘅牛奶，佢覺得味道好唔錯。睇嚟，蒙牛可以考慮搵佢賣廣告呢！今次去呼和浩特，周光暉仲同埋囝囝去，唔知囝囝有冇試飲蒙牛的牛奶呢？離開呼和浩特後，佢又趕去北京開會，果然係大忙人！