本文重點
投資銀行賓卡平日好風光，揸名車，歎紅酒，全靠做刁收佣。近日香港融資市場咁熱鬧，新股排住隊上市，賓卡們亦都密密做，冇停手。
農行臨尾削佣金
不過，原來近期啲佣金率愈來愈低，《彭博社》嘅調查顯示，今年香港嘅新股上市有37間，數目一啲都唔失禮，但平均佣金率只係2.2%，唔單只低過全球水平3.2%，亦係近十年最低。點解收得咁平？原來係受「新股集資王」農行（01288）所累。
話說農行喺香港上市，集資額有成220億美元，一早令班賓卡好鬼雀躍，成個新股市場好似翻生咁，中環老友都諗住食住農行條水實無死，點知，農行臨尾大減承銷商嘅佣金，據聞只係得1.96%，同當年中行（03988）及工行（01398）嘅2.5%真係冇得比。
農行減班賓卡佣金係有原因嘅，皆因有成40%嘅基礎投資者，係農行自己搵返嚟，有乜理由畀班賓卡賺呢筆佣，投行都冇計，惟有「收順啲」。呢個咁有道理嘅道理，據聞係農行副行長潘功勝度出嚟。