上星期去內蒙參觀當地嘅企業同內蒙市經濟發展委員會探討中港融合的發展，可謂見識良多，有幸參觀蒙牛（02319），真係好值得分享，行咗蒙牛一個圈，好似行咗佢哋嘅時光隧道一轉咁，學到唔少嘢。最令我印象深刻嘅係蒙牛由一間破舊嘅辦公室起家，用十年時間，喺乳品界由一千一百幾排名衝上第一名，佢同依利牛奶兩個加埋已經逾六成市佔率，符合先進國家市場經濟戰略模式，即係一個行業有兩個市場參與者佔咗壓倒性份額。
蒙牛苦戰十年嘅結果，原來同依家流行嘅企業文化不謀而合，筆者將佢嘅文化一一記低，發覺同西方管理戰略，例如質量控制、產品創新、社企責任……等等如出一轍。有一樣嘢筆者好欣賞蒙牛，就係佢哋會為每一個員工提供舒適嘅居住環境、休閒設施，咁樣可以令到佢哋嘅員工無後顧之憂，全心全意為企業打拚，我諗呢種精神，先至係蒙牛其中一個不敗之謎。