廣汽集團（02238）首日以介紹形式上市，全日高位9.4元，收報9.19元，成交4.93億元，駿威嘅小股東惟有將希望寄託喺廣汽身上。
自二月份開始停牌嘅天然乳品（00462），昨日終於復牌，股價曾低見1.42元，之後反覆回升，午後升勢加快，高位曾見2.12元，收市報2.06元，較停牌前股價升27%。由於公司需要再重新搞過收購新西蘭乳品嘅交易，咁樣踢高，係唔係有消息跟尾，抑或係再炒一轉散水，未知底蘊嘅情況下，做旁觀者最實際。
殼股異動可留意
此外，雖然近期有唔少二、三線股喺業績公布過後股價見光死，但唔知係唔係好多內地企業都喺香港搵殼上市，搞到殼價堅挺，唔少靜咗好耐嘅二、三線股，都開始有動靜。
上周宣布獲投資者提出全購嘅新洲印刷（00377）屬一例，另外，昨見佳訊（控股）（00030）宣布按每股1.38元配售2,000萬股，集資約2,700萬元，擬作為一般營運資金或減債，阿莊相信，以呢隻股嘅往績，有新資金肯進場唔簡單，留意會否有動作跟尾。
阿莊持有嘅上海實業（00363），昨日宣布中期業績，營業額增1.5倍至66.64億元，純利44.37億元，同比增長2.16倍，惟每股中期息同比僅升4.2%。期內收益包括喺今年二月完成出售醫藥企業權益交易所獲得嘅利潤31.98億元。
公司透露將物色珠三角、成都、重慶和武漢等地具潛力嘅高速公路項目進行購併，亦正積極收購優質水務資產，另外，將加快整合系內房地產業務，可見未來圍繞公司業務發展不愁正面消息，可安心持貨。
明年產能翻一番
講開業績股，又睇吓華潤水泥（01313），今年上半年營業額同比增長86%至50.94億元；純利6.07億元，增長66.1%。期內，水泥業務乃其主要收入來源，佔總收入近八成，其餘來自混凝土業務。
公司在業績報告中披露，目前旗下營運中嘅熟料、水泥及混凝土年產能分別為2,520萬噸、3,630萬噸及2,020萬立方米，估計到今年底前，三者年產能將分別增至3,570萬噸、5,260萬噸及2,670萬立方米，目標是到明年底進一步提升至5,500萬噸熟料、7,000萬噸水泥及4,200萬立方米混凝土。
喺內地水泥股中，華潤水泥現價估值具吸引力（預測市盈率十三倍）。昨日該股收報3.82元，有條件向上挑戰五十二周高位4.28元，支持位喺3.5元。
戰報
隆成集團（01225）
姚午齊尋日推介的隆成，股價即日一度高見1.17元，以全日低位1.11元計，單日升幅有5.4%。
興達國際（01899）
冼金基於上周五推介興達國際，其股價當日低位為5.6元，昨日創6元一年高位，累積升幅7.1%。