本地服裝品牌堡獅龍（00592）公司管理層大執位，尋日一次過宣布咗四個變動，其中副主席、執行董事兼行政總裁陳素娟（Kathy）辭任，十月一日生效；而大股東羅家聖太太錢曼娟就由非執行主席轉任執行主席。
羅氏家族近期都好多新聞，除咗捲入爭產案，堡獅龍本身亦屢次被坊間傳賣殼，話羅家聖揸住嘅六成幾堡獅龍股份會放售。
堡獅龍舊年七月刊登通告「自爆」大股東同第三方洽商緊出售股權，三日之後停止洽商，股價三日間暴升暴跌。之後喺八月，前主席羅家聖就宣布因為要退休而辭任，而羅太錢曼娟就代夫出征，喺十一月出任公司非執行主席。
今次Kathy辭任，通告話佢想要完成個人目標，太子知道Kathy係「進修達人」，平時已經好鍾意進修唔同課程，由語言到運動都有，唔知今次係咪都想再進修呢？