唔知係唔係炒家聞到燶味，近兩日唔少二、三線股都走晒樣，亦有唔少業績股，喺業績公布後不論好壞，股價即時見光死。從阿莊觀察，投資者擔心業績期過後，大市缺乏消息炒上，加上即將進入九、十月，每年呢個時候股海往往會有大波動，投資者睇唔通索性減少持倉，呢個想法唔難理解，故見港股交投不振。
上實發揮重組概念
新股耀才證券（01428）昨日首天掛牌，高位做1.86元，收報1.74元，較招股價1.6元高出8.7%，全日成交4.58億元，表現理想。此外，上周二阿莊買入嘅上海實業（00363），憑藉資產重組概念，走勢偏強，昨日曾高見38元，收市報37.95元，升1.07%。公司將於下周一宣布中期業績，旗下中新地產（00563）已宣布建議易名為「上海實業城市開發集團」，宜留意日後兩者喺內房業務發展上如何分工。
預計喺下月公布嘅《新興能源產業發展規劃》，將明確未來十年潔淨能源嘅發展路向，對此，天然氣可謂重中之重，估計至二○一五年，中國嘅天然氣年產量將由目前不到900億立方米，增至2,600億立方米，亦成為全球第二大天然氣消費國。
中國燃氣（00384）近年積極擴展燃氣業務版圖，截至今年三月底止，年度收入已突破100億元，其中管道燃氣銷售以及燃氣接駁收入分別達到38.3億元及14.6億元，而液化石油氣業務亦帶來46.3億元收入。
經營規模日益擴大
截至今年六月底止，公司累計共於19個省（自治區、直轄市）取得123個城市管道燃氣項目、8個天然氣長輸管道項目、91座壓縮天然氣汽車加氣站、1個天然氣開發項目以及37個液化石油氣分銷項目。作為一家非國有燃氣企業，如此經營成果實屬難得。早前公司向中裕燃氣（08070）提出嘅全購建議已獲逾五成股東接納，相信整合過後可帶來協同效益。
去年度，中燃共銷售33.8億立方米天然氣，管理層預計，截至明年三月底止年度之天然氣銷量可增至48億立方米。在燃氣市場快速增長，以及產業政策嘅全面支持下，中燃確為可造之材。
中燃昨日收市報3.97元，升1.02%。睇嚟由七月初開始嘅調整浪經已近尾聲，4元樓下可以耐心收集，中線持有可望有理想回報，主要支持位喺3.5元。
戰報
I.T（00999）
MAY尋日推介的I.T，逆市做好，股價創出3.88元新高，以低位3.68元計，單日升幅超過5%。
彩虹電子（00438）
本月十七日錢進推介的彩虹電子，昨日一度高見1.5元，較推介當日低位1.32元，累升13.6%。