日圓兌美元昨日創下十五年新高，展望本周美國公布嘅經濟數據亦利淡居多，短期外圍市況波動或會進一步拖低港股，轉機在於本周五美國聯儲局主席伯南克嘅講話，會否提及出台新一輪量化寬鬆貨幣政策。總之，短線大市波幅會擴大，看官緊記要握緊扶手。
年內A股易升難跌
再睇內地股市，滬、深兩市高收，其中滬、深B股指數分別升5%及3.2%，實屬鮮見，事緣市場傳出國際板很可能喺今年底或明年初推出，屆時A股與B股或會合併，B股估值將跟隨A股水漲船高，另對人民幣升值嘅預期亦帶動B股價格上揚。若然阿莊嘅睇法冇錯，喺保經濟嘅前提之下，年底前A股易升難跌，但嚟緊升市唔會再係由傳統嘅內銀同內房股作主導，取而代之將會係新興嘅新能源、文化產業及三網融合等概念。
陸續有企業宣布業績，銀泰百貨（01833）上半年賺3億元人民幣，同比增長42.8%，刺激股價升6.68%，收報9.26元。此外，從事子午輪胎鋼簾及胎圈鋼絲嘅興達國際（01899）亦宣布中期業績，純利4.76億元人民幣，同比增長1.37倍，股價曾高見5.94元，收報5.75元，升4.55%。
興達業績理想，主要係受惠中央接連推出基建項目，令本地貨運量回升，刺激貨車輪胎替換嘅需求；同時，汽車補貼計劃及海外市場逐漸復甦，亦為汽車業注入增長動力，並促進子午輪胎行業嘅持續發展。此外，今年一月出售風神輪胎帶來特殊收益逾1.8億元人民幣，但即使撇除是項因素，其核心純利亦有近五成增長。
為應付生產，去年興達已開始興建第九號廠房，預期整個項目將於二○一二年竣工，其中第一期已於今年上半年投產，令其子午輪胎鋼簾線嘅產能增加27%至40萬噸，而胎圈鋼絲則提升10.6%至7.3萬噸。另期內整體使用率由去年同期嘅61.4%增至86.2%，規模效益帶動毛利率上升6.9個百分點，至32.1%。
規模效益帶動毛利
除咗現有核心業務之外，吸引阿莊目光嘅，係興達已成功研發一種名為切割鋼絲嘅新產品，這種產品可廣泛應用於太陽能電池業，以切割多晶硅棒成為晶圓，據講試產經已完成，預計會喺明年大量生產，而現時公司逾半產能均適合製造此新產品。
計埋呢項因素，興達現價估值確具吸引力，股價表現應可保持反覆上升，短線若有回吐，可留意上車機會。
戰報
建滔化工（00148）
積奇周一推介建滔化工，當日低位35.4元，昨日升上38元高位，累升7.3%。
+7.3%
創科實業（00669）
史提芬周一建議趁低收集創科，當日低位6.41元，昨日高見6.75元，升幅5.3%。
+5.3%