Paul少認為，政府嘅招數，令到市場嘅投資氣氛暫時會收斂一下，而且亦都會改變咗現時市場炒家嘅生態環境。因為講到尾，政府呢啲花招，對於好多「實力派」嘅投資者嚟講，當然唔會有乜作用；但係對於啲「人炒我又炒」嘅跟風投資者，就難免會心怯。而呢班跟風投資者，好多都係「小本經營」，炒嘅亦係一啲上車客當道嘅細價樓，好難抵受猛力打壓；所以，除非手上件貨，對比起依家樓價仍然有一定「水位」，否則可都能會考慮盡快離場。尤其係嗰啲「膽粗粗」、用九成半按揭「扮自住」入貨嘅炒家仔，可能就更需要搵人接貨。同時間，金管局暫停咗九成半按揭，亦都會令到呢類冇乜實力嘅炒家「後無來者」，亦可以避免負資產大量增加嘅風險日益加大。

之不過，係唔係咁樣，細價樓就會出現「炒家傾銷益用家」嘅現象，上車客終於可以平價一圓置業夢呢？我Paul少就唔係咁簡單。喺細價樓市場，Paul少估計短期內可能會出現「大魚食細魚」嘅現象，即係一班小本炒家嘅「跳樓貨」，會迅速「過渡」咗去班有實力、可以睇得較為長線嘅投資者手上，先至會落入真正用家嘅手。

政策無阻入市信心

點解咁講？咪就係因為依家好多上車客，對於置業所抱嘅心態，往往都會帶有好重嘅投資元素，令到佢哋喺市況波動嘅時候，往往都係出現「散戶」式嘅猶豫，成日會驚買貴咗，又驚個市仲有得跌，所以唔能夠「手起刀落」火速入市。相反，一班早於六、七月大旺市時候已經出貨套現嘅投資者，就可以好快咁回應市場。結果，到班上車客察覺到唔應該再等嘅時候，可能又要準備迎接另一次嘅大旺市。

有實力嘅投資者，往往就會skip咗呢種憂慮，呢啲就係「快、狠、準」（當然，最重要係有「坐貨」嘅實力喇）。

須知道，以往樓市起跌嘅經驗話畀我哋知，如果樓市只係因為一啲措施造成波動，而唔係經濟逆轉，或者係長遠政策轉變嘅話，對於小市民嘅入市信心，係好難會造成長期以及「結構性」嘅打擊，即係唔會由「想買」變咗「唔想買」，只係會由想「現在就買」變成「諗過度過先買」，或者「要等『撈底』價」先買」。

所以，細價樓市場嘅購買力，並唔會咁容易就減少咗，只係啲措施會將購買力壓縮咗喺一個較短嘅時間裏面釋放，或者稍為拖延佢哋釋放嘅時間。所以，細價樓喺未來一兩個月，樓價「潛行」嘅空間亦都好有限，根本唔可以指望可以出現一啲「符合用家期望」嘅調整幅度。