本文重點
「殺價超人」城電（01137）王維基旗下香港寬頻，近日大賣廣告，佢哋為新客戶提供嘅99元100M寬頻月費計劃，將於月底恢復至169元嘅正價。
3香港1000M益街坊
正當大家都以為寬頻減價戰會暫時告一個段落之際，和電香港（00215）旗下3香港嘅家居寬頻又突然出招，揀正喺灣仔會展嘅電腦節，以148元月費推出1000M寬頻服務計劃，網絡商為推廣光纖寬頻而鬥益街坊，都可謂係香港電訊市場嘅獨有特色！
1000M寬頻有幾快，以下載一集約一小時（約8GB）嘅高清劇集為例，用8M下載要兩個多小時，100M下載要十一分二十七秒，1000M下載只要一分零九秒，不過亦要配合相關硬件。
講番今次減價戰，據知雖然只係剛剛遇着啱啱，事關3香港喺「出招」前，根本無預計過香港寬頻會恢復正價，依家推出梗係要食正個勢喺電腦節做推廣，優惠暫時亦只限電腦節呢幾日。