港股方面，高開後反覆向上，午後曾見全日高位21,297點，惟中移（00941）業績未有驚喜，股價回軟，觸發大市掉頭回落，恒指收報21,072點，升49點，大市成交616億元。
基本上，恒指已經喺21,000點邊行咗個幾禮拜，睇近期大企業宣布嘅業績大多符合預期或優於預期，論估值其實港股現水平下跌風險並唔大，只係向上破頂嘅動力還未足，故停留喺上落市局面。作為參考，短期恒指向上較大阻力喺21,800點，向下50日線支持喺20,658點。
回說中移，股價收報81.75元，跌3%。經過行業重組後，同業競爭距離拉近，中移面對嘅挑戰前所未有，可幸內地推動三網融合，整體市場仍在快速擴張，中移老大哥地位暫難動搖，相信未來市場焦點會放喺其布置三網融合業務策略，以及喺國際板掛牌嘅進展身上。
講開業績股，另一隻藍籌股中海油（00883）亦宣布中期業績，純利翻番至259億元人民幣。此外，將於今日宣布業績嘅中石化（00386），昨日成交大增至16.5億元，收報6.37元，升3.9%，話唔定又係春江鴨所為。繼續喺業績股中尋寶，阿莊早前炒過一轉嘅第一拖拉機（00038），亦會喺今日宣布中期業績，相信表現亦唔錯。
躋身全球手機十強
據內地業界統計，隨着本土自主研發嘅3G標準產業鏈完善和三網融合，內地手機業已全面進入3G時代，預期今年手機產量將超過7億部，佔全球產量嘅六成。可以想見，這個快速增長嘅流動通訊市場，為手機製造業帶來龐大商機，而衍生出來嘅增值服務市場規模就更加難以估量，無論係手機生產商、流動通訊商，抑或增值服務供應商，都受益不淺。
TCL通訊（02618）今年上半年嘅手機及配件銷量達到1,423萬件，其中海外市場銷量同比增長逾兩倍，首次躋身全球手機十強之列。隨着內地3G市場日趨成熟，將有更多消費者使用3G智能手機，近年投放不少資源開拓這類手機產品嘅TCL通訊，將步入收成期，業績表現可以睇高一線。
昨日TCL通訊股價終於打破近月嘅悶局，全日高位4.5元，收報4.48元，升9.8%，成交6,350萬元。
公司將於下周四宣布中期業績，上月經已就此發出盈喜，此前股價升勢先行啟動，預期下半年可更上一層樓，股價有勢挑戰四月份高位5.17元，失守4元止蝕。
戰報
中航工業（00232）
志強周三指中航工業或有好消息，當日低位0.37元，昨日股價一度升上0.41元高位，升幅逾一成。
+10%
金鷹商貿（03308）
積奇十八日建議逢回吐吸納金鷹，當日低位18.24元，昨日股價一度回升至19.6元，升幅達7.4%。
+7.4%