本文重點
資深經紀、證券業協會永遠名譽會長張天生出名識飲識食，一直視美食為人生最大享受，依家經紀行業個個都講緊港交所研究緊延長交易時間，由以往四小時增加至五個半小時，一旦落實，經紀肯定要縮短午飯時間，會有乜影響大家都議論紛紛。張天生咁鍾意美食，縮短午飯時間對佢咪好大影響呢？
慳番唔少應酬開支
張天生同太子講，如果午飯時間真係縮短到一個鐘，肯定可以慳番佢好多出外食飯嘅應酬錢，佢笑言依家一個月去不同會所食飯簽嘅單，為數真係不少呢！第日如縮短午飯時間，佢就會整「愛心飯盒」帶番公司「歎」，佢平時都有下廚整番幾味，如果整「愛心飯盒」，笑言可能比出外午膳更加好味呢！
雖然縮短午飯時間對佢個人嚟講無乜大所謂，因為佢啲客已上年紀，不用午飯時間見客搵生意，但佢話對於行業嚟講，好多人會受影響。
講番美食，雖然依家大熱天時，佢今個禮拜仍會返家鄉，尋找美食，可見佢對家鄉美食嘅鍾愛。
除咗美食外，佢亦好識享受人生，早前至同一班親友到西班牙同葡萄牙旅行，咁啱撞正世界盃決賽，西班牙對荷蘭，當地氣氛超高漲。
佢話能夠親身體驗，真係一世難忘，再配埋當地嘅風景同美食，仲好過去南非睇世界盃！