張大中傳助黃光裕

事關傳緊同國美主席陳曉有過節嘅前大中電器話事人張大中會借幾億元人仔畀黃光裕，幫佢同陳曉鬥過，而且仲係免利息，睇嚟國美事件都真係有排搞。

內地家電業係人都知張總同陳總以前有過「牙齒印」，事關喺○六年時，兩人分別係大中電器同永樂電器嘅掌舵人，喺陳曉嘅提議下，曾經與陳曉係競爭對手嘅張大中同意將兩家公司透過股權置換，實行合併結盟，由陳曉打骰。點不知唔夠三個月，陳曉去同黃光裕密斟合作，張大中當然唔想，可惜已經太遲，張大中惟有將件事提交仲裁機構，但最終無礙大局，國美結果收購永樂大中成功。

所以呢排個市仲傳陳曉計劃增發20%新股，攤薄黃光裕持股比例，啲人都深信張大中會助黃光裕一臂之力。

據內地傳媒報道，為咗呢件事，前兩日張大中已經由美國返咗北京助陣。