本文重點
特區政府上星期針對樓市炒風出招，地產及經紀代理行股份捱沽，是預期之內，但與八、九十年代唔同，今時今日地產股在恒指比重影響力輕微，尋日港股炒作主調，還是圍繞在落後的中移（00941）身上，大市呈低開高走再低收的倒轉V形走勢，期指於20,861點低位開出後，中段一度跟隨A股強勢回升，可惜歐洲一開市，港股立即打回原形，期指更以127點的大幅低水收市，連兩萬一也失守，報20,985點。
短期調整料完成
昨日期指低位及高位分別在20,843點及21,192點，分別低過及高過上周四五的波幅區間，基本上做出破腳穿頭的轉勢形態，若非午後市況異常疲弱，期指只要守在21,100點的上午收市價樓上，筆者會傾向相信短期調整完成，可惜未能成功。筆者一再強調20,960點揸好倉只屬短線博反彈，環球股市對聯儲局新一輪量化寬鬆措施反應冷淡，短期可見的利好消息唔多，大市極有可能繼續以上落市形式，消化六、七月份的升幅。
期指抵達21,180點的食胡目標，可惜畀中段假突破呃咗，無把握機會食胡，最後21,000點失守才急急平倉，只能夠以微利離場，現在較難取捨是以上落後炒波幅，抑或追逐破位的策略入市，筆者相信，升穿21,211點或者跌破20,720點會更有方向感，除非唔賭唔舒服，否則等市況明朗化才制訂入市方向，勝算較高。