國務院副總理李克強近日公開強調，要「堅決遏制樓市投機炒作」，更有消息指，銀監會正要求住建部提供「囤地黑名單」，以針對土地閒置嘅問題。好明顯，官方對樓市調控態度企硬，喺咁嘅大前提之下，睇怕內房股表現將繼續係有波幅冇升幅。
近日亦有大型內房企業高管預測，下半年內地樓市將會出現價、量齊跌嘅情況，可以預見，財務狀況較差嘅內房股，嚟緊將面對較大嘅經營壓力，但對具備財政實力嘅大型內房股而言，反可藉此機會以低價增加土地儲備。
回說A股，昨日滬綜指升2%，受出現超級惡菌嘅消息刺激，醫藥股受追棒，港股亦不例外，藥業股普遍高收。雖然所指嘅惡菌暫未有藥可醫，但短線炒家博大霧炒一轉亦唔出奇，相關股份可留意廣州製藥（00874）。
錦江酒店（02006）昨日復牌，並宣布向母公司收購錦江投資38.54%及錦江旅遊50.21%權益，作價合共26.94億元人民幣，其中7.7億元人民幣以現金支付，餘額按每股2.2元發行代價股份支付。該股昨日一度高見2.19元，收市報2.07元，無升跌。
或再獲母公司注資
錦江投資A、B股現於滬市掛牌，主要從事客運服務、現代物流及倉儲業務，而錦江旅遊B股喺滬市交易，主要從事旅遊代理業務，持有上海國旅國際旅行社、上海錦江旅遊公司及上海旅行社。換言之，完成收購後，錦江嘅業務將由目前集中喺酒店業務，伸延至上下游業務，大大完善其旅遊產業鏈，有助構建旗艦上市平台，亦足以顯示其於母公司加快實現整體資產上市嘅過程中，擔當重要嘅融資平台角色。
翻查資料，錦江國際經營業務包括酒店、餐飲服務、旅遊、客運、地產、食品、商貿等多項業務，另投資參與美國環球影城集團位於浦東興建嘅大型著名主題樂園。經過今次注資後，錦江嘅業務範疇已得到提升，未來將以綜合旅遊業務為發展方向，並有機會再次獲得母公司注資。
昨日錦江收市價仍低於今次交易所發行嘅代價股份作價，相信待消化停牌前上車嘅回吐盤後，股價可見真章，阿莊短期亦會留意沽出手持嘅香港中旅（00308），換入錦江嘅機會。
戰報
三一國際（00631）
積奇昨日推介三一，在盈喜帶動下，股價高見10.2元，以昨日低位9.55元計，單日升幅接近7%。
JOYCE（00647）
志強昨日指JOYCE股價嚴重偏低，昨日股價呈異動，最高升上0.345元，較低位0.295元，升近17%。