Amy十月就會放大假，問到退休後有咩搞作，佢就話退休後有個好大嘅挑戰－就係「無計劃」。又係嘅，Amy出晒名勤力，工作時間表經常排到密密麻麻，突然要適應悠閒嘅退休生活，的確會唔慣。

唔講你唔知，Amy自十六歲開始做嘢，除咗人人都知嘅金管局同銀行業外，仲做過補習、賣衫Sales，以至餐廳都做過，讀書時的Part-time更可謂一份接一份。

厄瓜多爾Banker接棒

至於接棒嘅龐華毅，太子八到佢係厄瓜多爾公民，已經喺銀行界做咗二十五年，仲做過花旗集團嘅南非行政總裁添。無獨有偶，九月初出任星展新加坡國家經理嘅林森成（Sim S.Lim），履新前任職花旗集團日本環球市場主席。