呢一輪嘅措施,睇落真係有板有眼,加埋新增三幅地皮拍賣,相信喺短期內點都收到啲效用,起碼啲冇乜實力嘅炒家,唔會再咁容易「擺大個頭」去入貨;用家亦都唔可以用太大嘅槓桿去買樓,從而減少風險。
樓市仍屬「贏多輸少」
不過,Paul少好想問一下,乜打擊炒樓就可以逆轉供求失衡咩?可以阻截源源不盡嘅內地資金流入咩?正所謂「要殺頭嘅生意都有人做,蝕硬嘅投資就一定冇人吼。」明知喺香港呢個自由開放嘅經濟環境,政府啲遏抑樓市招數,比起內地可謂「叻極有限」;而且當經濟情況仍然向上,本土對物業嘅需求持續增加,喺咁嘅大環境底下,樓市仍然會呈「贏多輸少」嘅局面。所以,就算係成本再高啲,都唔可以叫啲資金唔走入樓市㗎。尤其內地嘅同胞們,佢哋對於「買樓博升值」嘅信念,隨時比香港人更加堅定;叫佢哋唔好嚟香港買樓,即係叫佢哋去到上海千祈唔好入場排隊睇世博啫,你話佢哋睬唔睬你吖?
Paul少唔係想幫班庸官講說話,但其實大家都知道,樓市近年咁癲,其中一個核心問題,就係近年流入樓市嘅資金過於充裕,令到需求突然增大,從而逐步推高樓價。班高官話晒都係有學識之士,冇理由會唔知箇中嘅問題。之不過,正如Paul少上面所講,香港係奉行自由經濟,政府又點可以阻止資金流入?
仲有更加棘手嘅係,樓市經過咁多年,已經係本港大部分中產同埋富裕人士嘅「資產命脈」,莫講話唔可以立亂做「大手術」,就連想有些微嘅人為調整,施政者往往都要瞻前顧後。尤其經過九七金融風暴後嗰幾年險惡日子,好多小市民都係驚弓之鳥。另外,近年就連啲經濟能力比中產仲低嘅小市民,都投身喺樓海之中,令到樓市嘅利益牽連更加廣泛,仲有其他相關嘅利益體系,例如銀行、建築商等等,Paul少都未講到。所以,當樓市背負住咁大個包袱嘅時候,要落藥就更加要萬二分小心。
老實講,Paul少覺得本港樓市呢種生態環境,真係幾畸形,但係既然都形成咗,就冇辦法話改變就改變,惟有喺各方面去搵出個平衡點啫。
今次政府嘅出招,其實仲有好多細節嘢值得去講吓,從中亦可以搵到一啲樓市啟示。不過,篇幅所限,Paul少惟有下個星期再同大家去討論一下。