港交所尋日公布，簡愛嫦（Grace Kan）將接替陳翊庭，出任上市科首次公開招股交易部主管。

李小加今次真頭痕

數數手指，自從李小加上任後，港交所陸續有部門主管辭職或退休，包括前財務總監詹德慈、資訊技術科主管黃國權、前法律服務部主管高美萊、前行政管理部主管周樂森、前執行總監郭利沛等，多名猛將離任，李小加都咪話唔頭痕。

講番Bonnie，○七年四月加入港交所上市科之前，喺大型投行做律師，傳聞今次佢另有高就，重操故業做番律師，去律師行做合夥人。

Bonnie加入上市科以來，仕途看漲，市傳佢有機會做上市科主管狄勤思嘅接班人。不過，如今伊人已另謀高就。

接替Bonnie嘅係Grace，喺上市科多年，九六年十月加盟上市科後歷任企業融資、監察及首次公開招股交易等部門要職。佢本身係澳洲特許會計師公會嘅會員（associate member），加入上市科前曾喺多家會計師行工作，包括當時嘅安達信會計師事務所（香港）及喺澳洲嘅羅兵咸會計師事務所。