港交所（00388）近期確係頻頻出招，繼提升交易系統後，依家連交易時段都想同阿爺市場「同步追蹤」。大家都知全世界嘅交易所都以「阿爺市場」為一個重要根據點，依家新加坡同日本都話要建議延長交易時間，港交所又點可以唔跟呢！不過最大阻力一定係班「金牌經紀」啦！眾所周知，香港證券市場大部分都係B組及C組嘅證券行，佢哋由二○○○年開始，已不斷轉型求生。無疑港交所嘅動作、大方向係好，但係B組、C組經紀嘅配合亦都非常之重要，如果唔係，又會有人話港交所幫「老外」，放棄多年嘅「自家人」，都咪話唔進退兩難。
但「同步追蹤」只係第一步，仲有好多技術性問題，如金融產品如若可互相掛牌、上市公司帳目嘅互認，及內地市場的停牌機制！希望港交所搞「中港互通」時唔好「眼高手低」，最後只會令香港金融市場跌入「無間道」裏面，咁就大大鑊！