昨日A股受壓，主要係金融股領跌。港股跌市，內銀股亦較傷，建設銀行（00939）及招商銀行（03968）同跌逾3%，工商銀行（01398）、交通銀行（03328）及中信銀行（00998）同跌逾2%。講開內銀，聽講光大銀行發行A股將於本月十八日喺上交所掛牌，但由於光銀嘅流通市值相對細，相信市況波動對其上市計劃及掛牌初期股價表現影響有限。
中汽協近日公布嘅數據顯示，今年首七個月，內地車市累計產、銷量超過1,000萬輛，雖然增長較上半年放緩，但整體經濟效益保持向好，行業固定資產投資保持較高增長，且出口正在緩慢回升，庫存處於合理水平，故已將今年嘅產銷目標由1,500萬輛調高至超過1,600萬輛。
每年七、八月係車市淡季，已知七月份按月增幅放緩，相信八月份數字亦然，但說到底，全年計整體格局仍優於年初預期，汽車股調整得咁上下，又可以留意翻兜機會。
博私有化要識落車
利豐（00494）及利和經銷（02387）昨日雙雙停牌，等候一份有關利豐建議私有化利和經銷嘅公告。翻查資料，利和經銷喺○四年掛牌，當時發售價3.5元，過去五個財政年度年年都有錢賺，雖然○八年度盈利曾經倒退，但翌年又回復雙位數字增長，且派息穩定。
但說也奇怪，利和經銷掛牌咁耐，都冇咩大炒過，話咁快又話要私有化。難怪同樣長年交投唔多活躍、早具主板掛牌條件但卻未聞轉板計劃、分屬同系公司嘅利亞零售（08052），近日亦吸引炒家目光，昨日收報2.6元，升4.4%。不過，私有化呢家嘢向來都冇得估，街知巷聞十居其九係「流」，所以跟炒亦要識得落車。
喺內地從事製造飲料及方便麵產品嘅統一企業（00220），昨日股價逆市靠穩，收報4.43元，升2.3%，成交近1,003萬元。該股將於本月廿日宣布中期業績。此前已有大行發表報告，指由於該股要加大推廣力度搶佔市場份額，加上原料成本上升，故毛利率將受壓，從而影響盈利表現。
回看過去三個月，統一嘅股價表現明顯落後大市及同類股，某程度已反映市場對其中期業績嘅負面預期。昨日股價上升，已重上10日及50日線，相信係游資睇中炒落後，業績前守此區域可小注博反彈，目標上250日線4.6至4.7元水平，穿4.2元止蝕。
戰報
I.T（00999）
冼金基上月二十九日叫等候I.T調整作中線吸納，當日低位2.68元，昨日已創2.88元一年新高，累升逾7%。
維達國際（03331）
周一錢進推介的維達國際，昨日成功在逆市下創8.27元新高，即較推介當日低位7.69元累升7.5%。