本文重點
上周和黃（00013）公布中期業績「勁靚仔」後，股價一支箭咁爆升，聽講唔少基金追貨追到氣咳。無他嘅，連主席李嘉誠都話，一直拖累佢哋嘅3G業務快將有盈利，的而且確係一個好正面嘅訊息，唔怪得之前一直增持和黃嘅誠哥喺上周業績發布會上都講到明，佢個人及旗下基金未來都唔排除繼續增持和黃及長實（00001）。
不過，太子仲未見到誠哥出手，反而佢嘅兩位得力助手，和黃董事總經理霍建寧及財務總監陸法蘭，就已經率先齊齊力撐和黃。
公布業績後增持和黃
尋日據聯交所股權變動資料顯示，「霍大班」喺公布業績後一日（本月六日），就出手入市增持和黃100萬股，每股平均價56.751元，涉資5,675.1萬元，持好倉由0.11%升至0.14%。
同日陸法蘭亦入市增持15萬股和黃，每股平均價54元，涉資810萬元。雖然和黃股價尋日略為回落，但仍收報58.35元。短短兩日，「霍大班」及陸法蘭帳面就分別賺咗近160萬及65萬元，真係恨死隔籬。