中國移動（00941）終於一跳而上，企喺82元樓上，向○九年八月高位90元大踏步，都咪話唔犀利。與其要做嘢，又係「三一萬能俠」概念，即係三網合一啦！不如用管理學嘅智慧──「尋找相關股份，向股市出發」咪仲好。今次睇到隻星辰通信（01155），其往績PE大約8.7倍、P/B 1.2倍，如果有力追番同業平均水平嘅50%，計吓數都有4元，唔好咁盡，3.5元走晒，潛力都唔錯。
星辰為內地三大無線覆蓋解決方案主要供應商之一，主要銷售相關系統設備、基建工程，仲加埋數碼電視傳輸網絡產品，喺「三一萬能俠」嘅位置上互相輝映，佢嘅客戶件件勁揪，有中移、中電信（00728）加聯通（00762），佔九成以上生意額，大家都知電訊商嘅「黃金十年」正式開始，星辰又點會唔起飛呢！加上公司恢復派息及十送一紅股，簡直係「自信滿心裏」，睇吓星辰點樣一飛沖天啦！