恒指昨日早段都係呆呆滯滯，到下晝先至由中移（00941）發力帶動向上，收報21,801點，升122點，大市成交534億元。收市後中移宣布將於本月十九日發布中期業績。至於另一隻龍頭股滙控（00005），股價仍然受阻於250日線83元關，收市報82.4元，逆市跌0.36%。
昨日阿莊話恒地（00012）可以追落後，果然未有令人失望，股價成功上破50元後，勢如破竹，最高見52.2元，收報51.65元，升4.13%；另一隻同屬落後嘅新世界發展（00017）亦升3.8%，收報15元。呢期本地樓市發熱，但除非政府出手復建居屋，否則靠耐唔耐拍賣一塊半塊市區官地，且最終又以高價成交，咁只會令樓市炒風火上加油，未能解決根本問題。
內地股市靠穩，有關部門公布十八個工業行業淘汰落後產能嘅企業名單，榜上有名嘅企業，必須喺今年九月底前將落後產能關閉。上大人揸正嚟做，關閉落後產能冇得再拖，違抗者聽講話會遭停電對待。
咁做法最終得益嘅係班龍頭企業，相信水泥及鋼鐵業受影響較大，但當然，此舉對於整體市場供應嘅影響，最快要到今年底、明年初成效先至會漸趨明顯，若然想入市收集相關股份，依家唔使太過心急。
文化中國靜候消息
上周阿莊追入嘅文化中國（01060），繼續喺0.87至0.89元水平窄幅上落，聽聞原來該公司做「程咬金」，想截網易胡，收購MSN中國五成權益，不過雙方仍在洽商當中，進展如何仍有待公司正式宣布，此刻惟有靜候消息。
至於另一隻持股中國南車（01766）將於今日宣布中期業績，上周五股價現大幅回吐，但昨日又再重上高位，且成交增加，反映買家信心十足，呢架順風車搭得過！
昨日另一隻異動股乃長城科技（00074），高位曾見3.74元，收報3.7元，升7.5%，乃自五月中以來嘅高位，成交近5,000萬元。呢隻股未見有咩新消息，但純睇走勢，昨日以大成交突破了3.5至3.6元阻力區，應該追得過，呢轉博上4至4.2元，穿10日線3.42元止蝕。
順帶一提，上海實業（00363）喺35元水平橫行已經有兩、三個禮拜，唔知係唔係正醞釀「批盪」活動，若然有消息配合上破250日線36.5元，將可確認展開新升浪，唔好走漏眼！
戰報
中國玉米油（01006）
錢進於上周四推介的玉米油，昨日一度升上6.24元，較推介當日低位5.53元累升12.8%。
中國建築（03311）
積奇昨日推介的中國建築，早段曾回落至3.42元，但之後穩步向上，最後高收3.65元，單日升幅接近7%。