美國GDP三分之二來自零售消費，失業率高企在9.5%，會係經濟復甦之絆腳石。數據後，美匯指數跌到80.4，重返四月中低位，美債升孳息曲線整體向下，十年債息去番一年半低位見2.8厘，近期華爾街睇死聯儲局無條件加息，隨時仲要嚟多次刺激經濟，聯邦基金利率期貨顯示，即使去到明年六月議息會議，息口高於0至0.25厘嘅機會得71.3%（數據前是58%），相信看官們同筆者不禁想到，到底零息期無限延長？定係美國經濟雙底衰退對環球股市影響力較大？睇道指上周五先急跌後回穩，暫時睇嚟傾向樂觀的仲係佔多數。

放大圖片	除3G外，內地三網融合也為電訊商提供更多提升ARPU的商機。 【資料圖片】

短期超買先等調整

多得長和（00001及00013）業績撐住食尾胡，上星期港股連升五日認真威猛，似乎也無懼缸邊不少利淡消息，包括內地準備限制第三套房貸款，恒指最高見21,722點的三個半月高位。基於超買嚴重，短期再追的值博率唔係太高，錯過上星期升浪，不如等指數回到21,000至21,200點左右先再諗。

講開和黃，份中期業績遠勝預期，蝕了八年嘅3G業務終於翻身，現在，只剩英國、愛爾蘭及意大利，其他地區3G投資，上半年全部錄得扣除利息及稅項前利潤（EBIT），令分析員對和黃的睇法，從以往着重留意3G蝕幾多，轉去非3G資產的折讓身上。

iPhone及其他智能手機面世，的確令電訊商營運模式出現轉變，從話音主導變成數據收入增加，連家母也嚷着買番一部，方便平日行街上網睇股價買戲飛，智能手機的威力的確無可置疑。較意外仲係和黃上半年的每月每戶平均消費（ARPU）未見太大進步，但諗深一層，即使只係止跌，設施折舊滑落底下，3G貢獻也足夠三級跳的改善。

近期重磅股中國移動（00941）表現搶眼，股價去到十一個月高位，年初至今累積升12.9%，也跑贏大市。據投行消息，近期流入港股熱錢，不少向市場指數基金（ETF）埋手，最終益咗滙控（00005）及中移；其次，大孖沙對內地三家電訊商，在3G吸客及溢價收費的表現頗感樂觀，急急補貨。

中移估值現時不比公用股高，3G外，內地三網融合，也為電訊商提供更多提升ARPU的商機，被市場睇低多時，一轉勢隨時會成為下浪升市火車頭。