09/08/2010

播放本新聞相關短片
查詢股票編號

股海實戰:中國玉米油叩7元關

港股上周走勢甚強,加上內地A股整固,滬綜指喺2,600點水平現承接,上周五又再報升收場,股海人氣升溫,唔少已經靜咗好耐嘅股仔更趁機發圍,睇睇上周五港股升幅榜便一目了然。

阿莊上周落金魚缸,遇上一位舊戰友,呢位仁兄依家從事地產代理業,聽佢講呢排樓價係咁升,但專做二手盤嘅行家就愈來愈少生意做,皆因業主驚賣咗層樓買唔番,所以都好惜貨,市場上放盤幾乎掃乾掃淨,好盤難求,結果大家日日食白果,只係靠做吓租盤維生。阿莊問,依家樓市係咪有啲似九七年樓市爆煲前,佢就一語否定,皆因當年爆煲前市場放盤都多,但今時今日多咗班內地買家掃到出現「盤荒」,呢種情況與九七大有不同云云。

聽佢咁講,喺預期未來六至九個月低息環境將會持續,而樓市供應持續緊張下,除非政府做嘢,否則樓價會繼續易升難跌。照計掃唔到樓,可以直接入場掃番啲地產股傍身。

恒地有機追落後

上周大地主長實(00001)宣布業績後股價上揚,已重上「紅衫魚」價,而長實同新地(00016)現價亦已重返250日線樓上,相信正股升勢未完,可以留意吓相關衍生工具。反觀同樣係大地主嘅恒基地產(00012)股價仍未升穿250日線,有追落後概念。

講番股仔,呢期唔少仙股異動,靜咗好幾年嘅炒股都一下子生猛番晒。老實講,有番咁上下炒股年資嘅都知道仙股風險高,但每次升浪都有人落疊,因為升得快,正合搵快錢一族。阿莊無意阻人發達,總之都係一句,炒股大、細都好,最重要係投資者本身量力而為,壞人唔會喺額頭寫住個「壞」字,股票亦然,冇得輸打贏要。

上周五部分內地食品相關股份有異動,西王糖業(02088)及中國澱粉(03838)分別升9.76%及10.15%,大成生化(00809)及大成糖業(03889)分別升3.3%及4.7%。此外,中國玉米油(01006)走勢亦十分亮麗,股價升10%,收報6.11元,成交9,508萬元,值得留意。

中國玉米油係內地最大嘅玉米胚芽油生產商及玉米油製造商,隨着內地對食品質素要求提高,類似中國玉米油擁有自有食油品牌,享有一定嘅競爭優勢。去年公司實現純利1.2億元人民幣,較招股價預測之1.13億元人民幣為高。隨着管理層加大力度發展自有品牌產品,配合擴產,將有助進一步提升毛利率及盈利表現。

走勢上,雖然七月中、下旬法巴曾於場內減持該股,但無礙其股價升勢,由5元起步,升上5.5元才抖氣,上周五又再開車,一口氣衝穿6元,短線回吐守得住6元關,向上要挨近7元邊才有較大阻力,不妨留意搭順風車嘅機會。

戰報

中國大冶有色(00661)

志強上周四推介大冶有色後,股價連續兩日做好,上周五高見0.5元,較推介當日低位0.425元升17.6%。

中國水業(01129)

錢進上月二十九日推介中國水業,當日低位0.126元,上周五復牌一度高見0.145元,升幅有15%。

阿莊