不過，樓市經過咗七月份嘅「井噴式」旺市之後，Paul少相信，八月份唔係個個屋苑都可以延續落去。所以，八月份嘅大型屋苑表現，應該會參差。好似黃埔花園咁，Paul少就同嗰邊地膽Jimmy仔傾過，佢話經過咗六、七月一輪「狂風掃落葉」之後，黃埔花園可以剩得嘅盤，已經唔見咗七成，有個別細行盤源更加剩番唔夠10件，就算有客走入嚟，都未必有得介紹畀人。

樓價平 轉手快

除咗大型屋苑，Paul少近排亦留意到，啲居屋同公屋嘅二手市場，亦都前所未有咁旺場，最新嘅二手公屋樓王，樓價更就嚟去到200萬嘅水平。所以Paul少有班東九龍「炒鬼」friend，近半年都轉咗炒居屋，一來貪樓價平，轉手快，二來近排淘大花園、得寶花園等，樓價都升咗唔少，水位高咗之餘，客源亦都開始同以往唔同咗，未必可以好似以前咁，「連工包料」賺埋筆裝修數喎。

其實，佢哋好多時都係入咗件貨之後，就會搵相熟嘅裝修師傅執靚間屋，如果入手價係平嘅話，更加會買埋全套家電，搞到好似示範單位咁轉賣，觀感好啲，如果可以連裝修、家電條數，都變相「上會」做埋按揭，對佢哋都幾有利。所以呢班客通常價錢都唔會企得太硬，總之計過條數供得起就OK。

但係近年情況就好唔同。佢哋話，隨住樓價愈升愈高，呢類較為「草根」啲嘅上車客，喺最近都紛紛向下望，轉去搵二手居屋，甚至係二手公屋。反而留番喺淘大嘅客，好多都係新進「行家」，即係有舊錢唔知點好，於是見樓市好就走去買樓收租嘅新進投資者。於是，喺淘大入貨轉手，真係隨時可能「上家」同「下家」都係投資者，自己夾喺中間，又可以有幾多肉食呢，更加唔好講話可以賺埋筆裝修數添喇。所以，不如降落去玩次一級嘅市場，仲大把世界。

Paul少都覺得，二手居屋市場，喺未來一年低價市場，會大有作為；因為班低供款能力或者現金唔夠嘅上車客，唔可能同你盲目追貨，追到上去200幾萬，就係為咗買間400幾呎嘅淘大花園。但係，呢班人嘅買樓意欲都已經浮現咗出嚟，好自然就會投放咗去另一個市場裏面，退而求其次。

不過，Paul少奉勸大家，如果要投身喺呢個市場炒作嘅話，最緊要都係睇得仔細啲，每個單位都要驗屍咁驗，因為就算係同一個屋苑，A座同B座嘅手工都可以差得好遠，投資者真係要跟得足啲，唔可以單信口碑。