國際精密（00929）發盈喜，預期今年中期盈利扭虧為盈，主要為硬盤驅動器同汽車零件銷情，自○九年下半年以來不僅持續上升，今年上半年更大幅攀升。此外，集團的液壓零件銷量亦見回升，預期集團嘅三大主要業務營業額同盈利，將創下自○四年上市以來嘅新高。
過去兩年，集團業績出現倒退，○九年上半年更虧損2,450萬元，但下半年業務復甦，全年扭虧為盈，倒賺1,258萬元，每股獲利1.66仙。
集團今次發盈喜，表明未來業務同盈利將大幅上升，並預期今年上半年盈利將超越自○四年上市以來嘅新高。翻查記錄，集團中期盈利以○八年最高，達5,705萬元。保守估計今年中期可達7,000萬元；下半年產品銷量同售價持續上升，保守估計全年盈利1.5億元，每股獲利0.163元。現價0.92元，預期市盈率只有5.6倍。○九年底每股資產淨值1.15元，市帳率0.8倍。
國際精密近日股價現旗形整固，尋日由低位回升，相信調整完成，一破旗而上，照度上去，短期最少可見1.15元，市盈率亦只有七倍，仲係好抵買。