美國情況亦見一樣，GDP由去年第四季5%增長，玩吓縮啲玩吓縮啲，今年第一季增3.7%，第二季剩番2.4%，就連慣性唱好的聯儲局主席伯南克，前晚都不能不認經濟復甦之路仍然漫長，未來要靠寬鬆貨幣政策支持，華爾街股市睇死佢上任之後失業率翻一番，睇實接近七百萬市民打爛飯碗的奧巴馬政府，點都要中期選舉前「做啲嘢」，以刺激插水的民望及避免雙底衰退出現，結果股市偷步展現升浪。
歷史話畀我哋知，揸錢嘅大孖沙唔係一定百估百中，美國經濟步日本後塵，跌入持續通縮兼長期經濟不振的風險未可抹煞，但當下股民同基金經理習慣只爭朝夕，一於少理炒完至算，信智慧不如跟走勢，淡友也無謂死牛一便頸同個升市拗氣。前日恒指偷步升近四百點，到昨日仲有44點進帳，收報21,457點，經已比估計來得強勢，升市要多得滙控（00005），升1.45元，收報82.5元，貢獻恒指60點，計少一隻嘅話恒指實際跌少少。查實大市兩個多星期累積逾千五點升幅，開始出現超買，較健康發展係先回試21,200點支持先再嚟過。
大搞售後服務有錢途
中產家庭數目飆升，一些中產的消費模式開始在內地萌芽，奢侈品、家用汽車等銷售表現強勁，去年中國甚至超越美國，成為全球最大汽車銷售市場，1,350萬架新車落場，估計即使政府補貼範圍逐漸收窄，今年增長依然有一成五。過去幾個月，內地汽車股股價普遍調整幅度唔細，駿威（00203）、東風（00489）等基金愛股，一○年估值已回到十至十一倍的合理水平。不過，筆者睇中的並非製造商，有車階級可能感受到，買車儘管屬個人喜好，品牌揀選之外，銷售過程及售後服務好壞同樣重要，是買車重要考慮因素之一。
擁有超過半世紀歷史的汽車代理大昌行（01828）。去年市場以為他只是中信泰富（00267）炒燶外匯，用來套現自救的「非核心投資」。但隨着過去大半年，市場注意內地汽車銷售潛力之大，筆者看到來自投行分析員對大昌行的好評，的確愈來愈多。
集團去年在中國售出4萬部汽車，銷售額增長57.8%，比較上高於全國汽車銷售增幅（佔本身汽車業務比重增至75%，或者佔總營業額52.7%），意味着大昌行有能力在增長的市場上，擴大市佔率的優勢，今年公司準備進一步擴大內地代理生意規模，開六至十間4S店外，配合內地富豪買家市場，並且計劃增加賓利代理商數目，最重要是僅及十倍市盈率，在行內競爭優勢較高之外，估值亦比汽車股吸引。