滙豐於去年下半年已開始密密請人，每次請人嘅數目都成百或以上。日前佢哋集團公布業績時亦有提及未來要請幾多人。

滙豐亞太區行政總裁王冬勝話，重點發展嘅中國、印度、澳洲等地都持續增加人手，中國今年就會至少再請多300至400人，香港亦唔例外，都要請多啲人手。同係恒生副董事長兼行政總裁梁高美懿亦話，計劃今年在香港及內地分別增聘400人及200人。

提早加薪挽留人才

不過講咁多都無用，太子發現滙豐香港區喺上半年人手總量比去年同期多咗嘅人數都唔夠100人，而計埋亞太其他地區，都只係多咗364人。王冬勝就話，金融人才搶手，流失量之大亦可預期，所以滙豐對市場薪酬調查都着緊咗好多。

梁太亦話恒生有好多空缺，但請人有困難，所以為挽留人才，部分工種毋須等到出年都有人工加。換言之，啱啱喺四月整體員工加人工後，按員工表現同埋工種又再加多一次。