A股做好加上建行（00939）供股獲銀監開綠燈，刺激內銀股帶動大市，恒指尋日以接近全日高位收市，升382點，收報21,412點，重磅股滙控（00005）加埋三大國有銀行帶來130點進帳，相當於大市升幅三成四，期指轉炒高水，升451點，報21,422點，對於揸好倉揸了接近兩星期的筆者，睇見都「肉赤」。

已呈超買切忌摸頂

來自美國的貸款撥備大減，滙控業績較預期好，唯一美中不足的是，中東貢獻較大行估計稍稍遜色，從倫敦時段堅挺的走勢可見影響唔大。除非美國尋晚ISM數據有意料之外結果，今日好友再下一城將港股推至21,500點樓上機會極高。基於唔知滙控業績開大開小，加上由20,300開始一直建立的好倉收穫唔錯，筆者承認策略過分保守，等期指回補20,685點上升裂口才買，看來得個睇字。

雖然睇好後市，但錯過21,000至21,400點的升幅，總不想今早嚴重超買下摸頂揸貨，想買最好等調整出現，進取的筆者會試一試早上以四分之一注碼即市試沽，實行偷雞，目標在21,500至21,550點開倉，但不會過夜。