尋日升市，其實升得相當全面，藍籌除咗中國平安（02318）停牌之外，全部錄得升幅，恒指升382點，收報21,412點，當中130點來自收市後出業績的滙控（00005）以及三隻國有銀行股身上。建行（00939）獲銀監會批准供股，集資提升資本的計劃進入最後直路，刺激升勢。即月期指收報21,422點，轉炒高水，由美股及內地股市向好的客觀環境，以及再有資金流入港元，形成拆息級級落的大環境，今個升浪頗大機會挑戰22,000點水平，甚至是四月的22,388點高位。
樓市開始止跌，美國銀行生意最壞時刻應該過咗，業績反彈來自撥備減少，滙控公布六月底止中期賺67.63億美元，增長1.02倍，屬市場預測52.1億至71.6億美元的中上水平，派息無變，維持上一季度及去年同期的8美仙。數字曝光後，倫敦股價升近5巴仙，儘管執筆時，未有地區細分數據，初步睇嚟，市場頗滿意呢份成績表。
滙控短線未威完
查實翻查資料，過去五次業績期（中期或全年），滙控三次（○八中期、○九中期及全年）差過預期，僅兩次（○八全年及今次）高過估計，上次公布時係○九年三月海嘯最恐怖兼供股，股價級級落全無高潮可言，相比今次較綜合預測高6%左右，斷估股價都應該有幾日威吓。講番中資股，人行近期貨幣政策字眼，的確比前時有所軟化，大家都估緊甚麼是「適度寬鬆的貨幣政策」，姑勿論如何，筆者估計對財富效應心理打擊最大嘅房地產稅，至少短期內出籠的機會極微，內房股可以從接近一年的調整浪中作出反撲。
事實上，幾間大型內房股公布的七月份售樓數字相當唔錯，富力地產（02777）銷售額30.92億元（人民幣．下同），比六月大幅反彈89%。一心炒政策轉向，筆者睇中近一年賣掉公路、徹徹底底投身內房建屋生意的越秀地產（00123）。
上半年銷情理想
由於比較基數低，今年首六個月累積售樓收入及面積，比去年同期有1.61倍及58%大幅增長，去到54.23億元及33.18萬平米。細看每月數字，除六月增長輕微放緩外，這主攻廣州市場的新進內房企業，表現唔錯，半年已達到全年賣樓套現目標的七成。
本身擁有750萬方米可建樓面的越地，上半年並無急於補充地皮，大手賣樓後正好趁銀彈充裕執平貨，管理層增加土儲預算今年達50億元，以年內套現金額應是綽綽有餘；再者，越地本身近兩三個月淡市售樓未致太差外，中大型內房股重估後較資產淨值高出一至兩倍不等，而大行估計，越地年底每股值1.97港元，現價仲有1%折讓，相對股價仍然相當具吸引力，不妨留意。