事實上，睇美國嘅經濟數據，隨處可以找來沽貨藉口，但偏偏美股上周五走勢令人喜出望外。理由好簡單，班炒家睇死未來六至九個月美國都冇條件加息，確認咗低息環境將持續呢個重要訊息，一於放心落場炒個痛快。
執筆時，滙控（00005）中期業績消息似乎略優於預期，歐洲股市大升，睇怕全球股市八月開門紅成定局。投資者求勝反應必須夠快，眼見大市多次未有理會壞消息照升可也，便可確認今次升市係堅料，有理冇理入場掃番啲貨傍身。淡友亦別再死牛一便頸，記得炒作要嚴守紀律，「磨爛蓆」難有好下場。
內地股市持續向好，滬綜指收報2,672點，升35點，兩市主板總成交額2,113億元人民幣。內地七月份製造業採購經理指數連續第三個月下跌，但跌幅收窄。市場解讀為宏調政策成效明顯，既然政策既定目的已實現，為了應對經濟增長放緩嘅問題，嚟緊中央將放鬆銀根保經濟，股市牛氣重現，又係壞消息當好消息炒嘅例證。
內銀股料成火車頭
五月初國企指數跌穿250日線，昨日係繼六月廿一日後，第二次喺250日線樓上收市，若短線能確認企穩喺250日線（12,131點），後市可向12,500點水平進發。集資陰霾漸散嘅內銀股，可望成為火車頭。
睇好國指短線表現，可留意成分股國藥控股（01099），皆因呢隻股市值逾200億元，夠分量，再加上近期藥業股氣氛亦唔錯，喺雙重動力推動之下，昨日股價已重上30元樓上，走勢向好，睇位跟進，目標睇35元，穿28元止蝕。
近日升市股份升勢全面，細價股亦唔輸蝕。阿莊早前炒過一轉嘅文化中國傳播（01060），上周五已見異動，昨日公司宣布擬收購互聯網相關業務，刺激股價升上高位0.87元，收報0.86元，升6.17%。表叔線話，今年尾明年初，文化產業股將會大炒一轉，呢隻股定位清晰，而且業務涉及傳統及新興文化產業，估值有數得計，炒得安心。不過其股價呢兩日升勢太急，反正新收購尚未落實，等回試0.8元承接再作考慮。
另一隻有新消息嘅股仔，乃阿莊喺三月份購入嘅田生集團（08136）。公司宣布以總現金逾2.08億元，收購九龍城賈炳達道一批舊樓，完成後將進行重建。聽講現時公司手頭四個舊樓重建發展項目，總投資額逾20億元。雖則話公司可透過取得銀行貸款應付發展，但若然股市氣氛利好，冇理由唔炒高股價批股集資，所以會繼續坐定定靜候佳音。
戰報
中國鐵鈦（00893）
姚午齊上周二推介的中國鐵鈦，有唔錯表現，以當日低位2.81元計，升至昨日高位3.19元，累升逾13%。
+13%
訊通控股（08082）
志強上月二十七日指訊通值得一博，結果該股以推介當日低位0.114元計，升至昨日最高見0.177元，累積升幅逾55%。
+55%