近期最多古仔講嘅肯定係銀行股，工銀亞洲（00349）終於被母公司工商銀行（01398）「收歸國有」，激發起市場賭其他二、三線銀行未來被購併之可能。早前市場傳聞，工行出價可能去到2.2至2.5倍市帳率，相對停牌前的1.68倍，認真誇張。
儘管以工行本身過萬億元市值，加上已揸住七成二的工銀亞洲，出多少少溢價影響唔大，但以大行預測的資產估值計算，目前工銀亞洲的一○年底市帳率大約2.23倍，基於收購只係例行公事，對工行的增值作用不大。史提芬本身唔係好信正準備集資滿足資本需要的工行，會大手筆到出天價買埋餘下兩成八股份，相信畀到2至2.2倍市帳率，都已經算係對得住一班小股東。
炒私有化小心反高潮
珠玉在前，永亨（00302）及創興銀行（01111）先後被炒高，現價計○九年市帳率1.98倍及1.12倍，同街外傳聞工行出價一併，火燒冷灶一啲都唔令人意外，但歸根究柢，買股票博畀人私有化總係偏門少少，盈利回報能力先係至緊要，兩間銀行一○年預期市盈率在十五至十六倍左右，唔算貴，但肯定唔算超值，係咪仲要追見仁見智，小心工行出價曝光，炒風會來個反高潮！
講開又講，上星期IMF（國際貨幣基金組織）發表美國金融業評估，認為美國金融體系正緩慢復甦，但底子仲係脆弱，受唔住經濟壓力嘅弱勢銀行，可能需要集資高達763億美元（5,920億港元）額外資本，數字出來，市場並無帶來太大震盪，事關同一時間，歐美銀行業要求獲得回應，就需要更多時間籌集資金滿足新資本規定，巴塞爾銀行央行監管機構一如預期地就範，把《巴塞爾資本協定三》草案作出內容修訂，放寬資本計算標準及給予更長過渡期，此舉大大紓緩環球銀行齊齊大規模從市場吸金的壓力。君可見，國際級銀行滙控（00005）近日亦一洗近半年頹勢，升勢十分似模似樣。
滙控今日收市後，將會公布中期成績表，《巴塞爾資本協定三》修訂來得及時，大行急急修訂一級資本比率預測，主要係部分海嘯期間貸款減值撥備所獲退稅部分獲得計帳，由彭博資訊的綜合預測，大行的估計相當參差，估會介乎52.1億至71.6億（美元．下同），平均數大約59.5億元。
近期公布業績的北美銀行，唔少因為撥備減少業績至好轉，滙控股價可唔可以更進一步，關鍵在於收入及淨息差的疲弱表現見唔見到轉機。
樂觀睇，《巴塞爾資本協定三》修訂減低咗滙控集資壓力，可惜近日股價累積升幅唔細，睇怕聽日裂口上升或者回落的機會仲係五五波，想買，最好仲係等埋業績。