展望本周，大笨象滙控（00005）、渣打集團（02888）、長實（00001）及和黃（00013）將會公布中期業績。由於次季發生歐洲債務危機，相信滙控的歐、美業務表現仍然難睇，全靠新興市場撐住。上周滙控股價一度重上80元關，上周五收報79.75元，短期要企穩喺250日線82.5元，才能更上層樓，所以嚟到呢啲位，都係唔好太過進取。
滙源果汁（01886）上周宣布，其第二大股東達能將向私募基金SAIF Partners出售所持22.98%股權，每股作價6元，估計整項交易涉及20億元。查實達能先後與光明、蒙牛（02319）及娃哈哈不歡而散後，市場對於今次其悉售滙源持股，並不感到意外。
無可否認，這個作價遠較兩年前可口可樂提出嘅收購價每股12.2港元為低，但別忘記，當年可口可樂提出嘅係全購建議，而且當時大家對於可口可樂一旦成功與滙源締結良緣後嘅境況作無限憧憬。及後好事未成，加上一場金融風暴嘅洗禮，憧憬消失之餘，市場給予嘅估值亦大有不同，可見「此一時，彼一時」，實在難作直接比較。
滙源值得另眼相看
至於新加入嘅股東SAIF Partners，聽聞喺內地食品、飲料及農業領域投資經驗豐富，即係話對行情有相當了解，今次睇中滙源，亦必無寶不落。值得一提的是，今次新股東與滙源簽訂「員工現金收益計劃」，若未來滙源業績達致一定指標，呢位新股東會將其購買股份嘅7至7.5%所帶來嘅淨現金收益用於激勵公司管理層和員工。
所謂「小財唔出，大財唔入」，新股東豪爽，顯見係有心栽培呢家公司，唔係快進快出之徒。有咗呢支強心針，股價值得另眼相看，上周五收報5.97元，6元樓下可逢低收集。
講完果汁股，又睇番一隻內地能源股，就係昆侖能源（00135）。自兩年前撥歸全國最大油氣生產及供應商中石油（00857）旗下之後，公司獲注入多項石油下游業務，主力拓展天然氣終端銷售和綜合利用業務，成為中油拓展清潔能源和新能源業務嘅旗艦，股價亦經已翻咗幾番。
由於天然氣業務尚處初步發展階段，故去年相關貢獻有限，相信今年可較全面體現成效。今年以來，其股價在10元水平上落，下半年有機會出現突破。八月底、九月初宣布中期業績前，可留意10元樓下收集嘅機會，目標12元，250日線支持喺9.17元。
戰報
寶勝國際（03813）
錢進上周二指寶勝具反彈空間，果然有眼光，上周五高見1.08元，較推介當日低位0.93元，累升16%。
+16%
三一國際（00631）
姚午齊於七月二十八日推介的三一國際，上周五一度升見9.03元，較推介當日低位8.57元，升超逾5%。
+5%