六月份美國耐用品定單差過預期，加埋聯儲局發表的褐皮書對經濟展望一般，道指前晚跌39點，可是港股在期指結算日，未輕言放生淡友，恒指升2點報21,093點，午市後以為七月期指結算價塵埃落定，好友會放軟手腳，殊不知現貨收市之後，八月期指愈掃愈高，以21,161點接近全日高位收市，計埋八月份藍籌股息除淨因素，足足高水逾百點，八月港股依然唔可以睇小。

蒙牛乳業（02319）遭兩名主要股東減持5,070萬股，股價跌0.8元報24.1元，險守配股價23.95元樓上；滙源果汁（01886）第二大股東達能，把將手上接近兩成三股份賣畀私募基金SAIF，每股出價6元比早前市價5.42元高出10.7%，消息令滙源股價尋日升0.41元，高收5.83元。

以高於市價出貨當然值得高興，但如果唔善忘，應該記得三年前，可口可樂在海嘯時以天價每股12.2元想買起滙源，可惜交易被中國商務部否決，相信當時正積極沽售非核心資產的達能，已恨得牙癢癢，今次只算跌咗個橙執番個桔。交易最有趣仲係SAIF等私募基金通常無興趣同投資目標談戀愛，滙源預期市盈率三十倍一啲都唔平，而達能都賣，意味着其他公司即使睇中滙源，要成事唔易，到底咩葫蘆賣咩藥，不妨繼續睇劇情發展！

中糧控股（00606）剛以發股票及港元定息有擔保可換股債券，集資54億元，兩者比例大約是三分之一與三分之二，批股股價潛咗兩日水，尋日上番8.89元。

下半年料漸入佳境

今次中糧配股規模唔算大，新股相當於發行股本4.61%，即時每股盈利攤薄幅度唔大，換股債券部分查實條件唔錯，五年期1厘息。

睇番去年總負債128億的中糧實際利息成本大約3.5至4厘低一截，即使減去55億現金部分，淨借貸比率46%唔算低，趁息低伸手有助紓緩未來兩年資金壓力，尤其面對投資回本期較長的擴產計劃。最令人失望可能是今年不振的股價，年初至今累積跌12.8%，跑輸大市。查實油籽加工屬於資本密集生意，由管理層透露的擴產規模，市場預咗今年資本開支，會由比去年26億翻兩番去到80億至90億元，形成股價級級落。

然而，集團成功取得融資，筆者反而認為困擾股價的不明朗因素反而少咗，皆因這類股份，通常在資本投入高峰期時，股價會最殘，但當步入收成期，在業績配合下，走勢通常會明顯好轉，相信這個轉角位會在今年下半年左右出現，睇現時估值唔算高，9元樓下有中長線持貨打算的，值得諗吓。