山頂地皮拍賣成交價高，帶動豪宅升勢沒完沒了，政府說賣地成交價反映市況，也許高官們可以話，豪宅用家非普羅大眾，價格飛升對市民影響並不直接，但實際上，豪宅價格往往係整個樓市嘅風向儀，豪宅價格再拉高，本已令用家吃不消嘅中小型樓價，最終亦勢必跟隨，用家被愈拋愈遠，政府咁樣叫做增加土地儲備，算唔算係幫倒忙？
內地股市昨日持續盤整，但兩市總成交企穩喺2,300億元人民幣樓上，相信好戲在後頭。阿莊多次重申，針對內地市場，政策市向來都係冇得估，但當政策醞釀成熟，每每都會見到消息靈通嘅春江鴨落場飲頭啖湯，近期A股表現可能係一個最好嘅寫照。
汽車股悄悄地又再開車，昨日輪到吉利汽車（00175）、華晨（01114）及駿威（00203），股價升幅介乎2至11%。近日有內地傳媒報道，針對上半年汽車市場增長放緩嘅問題，中央政府有意把一些汽車消費政策和刺激政策，逐步變成一些長遠政策。
車股追落後揀慶鈴
事實上，汽車銷售佔全國零售額較大比重已屬不爭事實，加上汽車工業聘用不少勞工，促使汽車產業穩步發展，應視為保持經濟穩快增長嘅重要一環。若然嚟緊中央政府真係再刺激消費，相信唔少得汽車業一份。正所謂有危才有機，自問經得起風險，追落後可留意慶鈴汽車（01122）。
講開內需股，好耐未有留意隻康師傅（00322）。公司今年首季營業額同比增23%至14.4億美元，純利1億美元，增長10%，增幅未及營業額，主要係受原材料及勞工成本上升嘅影響，毛利率同比下跌5個百分點至30.35%，而今年以來其股價扭轉去年次季以來嘅大升勢，轉向反覆上落，正好反映呢個因素。
若然未來數月內地通脹壓力持續增加，類似康師傅呢類大型企業，有條件透過加價，將成本漲幅轉嫁消費者。此外，次季起飲料銷售又進入旺季，可拉升整體銷售表現。
昨日康師傅收報19.6元，升2.3%，成交1.56億元。公司將於下月十六日宣布業績，若短期能趁升市成功突破20元橫行區阻力位，話唔定預示業績將報佳音，博啱方向目標可見21元，跌穿18.6元止蝕。
順帶一提，前日買入諗住短炒嘅威勝集團（03393），昨日最高見6.4元，收市報6.39元，阿莊以平均價6.3元沽出，一日已有不俗利潤。
戰報
大成生化（00809)
錢進於本周二指大成生化反彈未完，昨日其股價最高見過1.27元，較當日低位1.12元，升13.3%。
耀萊集團（00970）
冼金基於本周三推介耀萊，當日低位0.73元，昨日最高升至0.8元，短短兩日間便上升9.5%。