陸東（Andrew）有「最準分析員」嘅美譽。太子每次見到佢，都忍唔住問佢點睇股市同樓市，所以覺得佢形象既嚴肅又專業。原來陸東都有感性嘅一面，太子見佢嘅辦公室擺咗一啲好有趣嘅陶塑，細問之下，先知係陸東所做嘅善事之一，呢啲作品由一班弱能人士所做，陸東會幫佢哋搞捐款活動，既出錢又出力，睇得出佢真係由心出發。
支持弱能人士藝術
依家喺瑞銀做外部顧問嘅陸東，一直都好支持聖雅各福群會活動，特別係推動弱能人士嘅陶藝發展，除咗捐款贊助，佢平時一得閒就會落去灣仔石水渠街嘅「陶藝工作室」探吓班成員，以行動支持。
Andrew咁支持「陶藝工作室」，佢就娓娓道出因由：「香港係富裕社會，有啲人嘅際遇比較幸運，自己就係例子，但有啲人未必咁好彩，所以有能力嘅時候，就應該回饋社會。
展覽活動親身主禮
我透過呢班弱能人士所造嘅陶塑，就感受到作品之中存在天真嘅心靈，但又擁有大人嘅力氣，所以都買咗唔少當做擺設，有啲放公司，有啲放屋企。」
咁啱下星期一下午兩點半喺尖沙咀海港城會舉辦「泥造人．樂造人」陶藝展覽，到時Andrew亦會擔任主禮嘉賓。