按照筆者原先的計劃，所以尋日決定把一半注碼買入八月期指好倉，惟收市前，就先將七月好倉平掉，不等今日期指結算。

儘管昨日大市成交終於有600億樓上，算似番啲樣，但仍然不想揸太重貨過夜，基於午市賣地後期指浸浸落，地產分類指數更一連兩日高開低收，擔心近期升幅唔細嘅地產股，有好消息出盡調整的風險。

其次，就是國企股相對來說，仍然顯得有點「疲弱」，唔單止未能跟隨恒指升穿六月中高位，收市報11,972點，即係連周一高位12,022點都未能升破，恒指本身強弱指數同樣出現有輕微背馳的情況。結合種種迹象，故即使睇好後市，都唔想在結算前揸太過重倉過夜。

期指結算波動難免

八月期指尋日朝早開得唔算高，順利在21,000點樓下揸貨，暫時帳面有數十點利潤，可惜國企及地產股初現疲態，今次好倉不打算勉強要去到21,500點中期目標才平倉。今日結算日，早市相信波動難免，要隨機應變，即市目標21,170點，如跌穿20,920點會先沽出再等機會。